اول بداياتي مع الكتابه...( اعرف انك كبرت)

لما متحسش بالفرحة في العيد زي ما كنت بتحس بيها زمان 
لما تكون قلقان و خايف من بكرة مخبيلك أية 
لما تكون هموم الدنيا كلها فوق دماغك 
لما تنام على الكنبة و تصحى بردو على الكنبة 
لما حد يوجعك في قلبك
لما تكون بتداري حزنك بضحكة
لما تحس بالوحدة و مش لاقي حد جانبك
لما تفتح التلفزيون لمجرد دوشة عشان متحسش بالوحدة
لما تكون بتتمنى راحة البال
لما ساعات تتمنى ان الزمن يرجع بيك لوره
لما تلاقي الدنيا حواليك بتديق و الخوف و القلق و
الحزن بيكبروا و الفرحة بتقل جواك
لما تلاقي نفسك لوحدك و مسئولياتك كل يوم بتزيد
لما معدتش تاخد مصروفك و بقيت تصرف على
نفسك
لما تلاقي يوم عيد ميلادك انك كبرت سنة بس عمرك بينقص
ساعتها أعرف انك كبرت..

مرور الوقت

مع مرور الوقت بنلاقي نفسنا بنحب حاجات مكناش بنحبها...بنكره حاجات كنا بنحبها...وحاجات كنا بنتمناها مبقتش فارقه معانا...وحاجات مش في أيدنا و بنكون هنموت عليها...و نبعد عن اللي شارينا و نجري ورا اللي بايعنا....و ترجع بذاكرتك لورا لأي موقف تلاقيك بتقول في نفسك أنا ازاي عملت كده أو كنت كده وأنت مش عارف إزا كنت انت اتغيرت ولا الزمن اللي اتغير....
‫

متخليش حياتك

12 · Edited · 

متخليش حياتك تقف...عند كلمة مستحيل...عند
كلمة مش هتقدر...عند حد قرر أنه يسيبك و مفكرش حتى يلتفتلك...عند حاجه كان نفسك تحصل و محصلتش...عند حلم كان نفسك يتحقق و رسملك ابتسامه و أمل أنه ممكن يتحقق و طلع مستحيل...عند هدف كان نفسك توصله و بنيت مستقبلك عليه و معرفتش توصل...عند صديق كنت فاكر انه وفي بس خذلك...عند أزمه و ضيقه و ولقيت أقرب ماليك عمل نفسه مش عارف..عند ندم على حاجه عملتها و بتقول جوه نفسك يارتني ما عملتها و لو يرجع بيك الزمن لورا مكنتش هتفكر تعملها.....عند حياه كنت راسمها لنفسك و لقيت نفسك بتعيش زي مالدنيا عايزاك تعيش...كل حاجه و ليها و قتها في حياتك و مفيش حاجه بتفضل زي ماهي...الوقت بينسي...ولازم تروح حاجات عشان تيجي مكانها حاجه تاني....

ناس

في ناس بتخليك تكره اليوم والساعه اللي عرفتهم فيها...و تتمنى متسمعش اسمهم ولا تشوف وشهم...و يخلوك تقول ازاي في ناس كده واكيد انا مكنتش في وعيي وانا بفكر فيهم...في ناس بتخليك فاكر تاريخ اليوم اللي قابلتهم فيه و حافره جوا قلبك...وتتمنى انك كنت تعرفهم من اول يوم في حياتك...بيبقوا بالنسبالك طوق نجاه اللي ماسك فيه عشان تفضل في الدنيا....بيبقى نفسك تعيش ولو يوم زياده على عمرك عشان بس تبقى
جمبهم...
‫

لو ارتبطت

لما ترتبط بحد...اوعى تاخد رأي اللي حواليك على اي حاجه بينكوا...عشان كلهم هيقولولك كلام من منظور التجربه اللي هما عاشوها و بس...وكل واحد هيكون عايزك تعمل اللي هو فشل في انه يعمله...و هيحسسوك ان الشخص اللي انت معاه مش مناسب...عشان انت شايفه حاجه و هما شايفينه حاجه تانيه خالص...وعمرك ما هتلاقي اللي يقول كلمة حق او يوجهك للصح...كل واحد فينا ليه وجهة نظر مختلفه عن التاني عشان كده اعمل اللي يريحك في كل حاجه عشان متجيش تلوم على اللي مشيت ورا كلامه و صدقته...وفي الاخر محدش بيتحمل نتيجة قراراته غيرك....

لو لقيتي

تخيلي لو لقيتي اللي بيفضي نفسه عشان بس يكلمك...ويقوم من وسط لمة صحابه و يقولك وحشتيني على فكره...واول ما يصحى يكلمك وقبل ما ينام برضه يكلمك... وبدل ما يقولك انتي بتخنقي عليا تلاقيه بيقولك انتي اللي بتحلي دنيتي...لما تبقي معاه تلاقي ف عينيه في لمعه غريبه واكنه هيطير من الفرحه و نفسه يخدك جوا حضنه يخبيكي من كل الناس...لما تلاقيه بيقولك انتي بتعتي انا وبس و مجرد ما تكلمي راجل غيره تلاقيه هيموت من الغيره عليكي...وتلاقيه هو اول واحد بيعملك اي حاجه نفسك فيها...ولو في يوم كان هيموت من التعب وانتي مش عايزه تقفلي وتلاقيه قعد عشانك....
‫

one day

One day you'll find yourself no longer young...your head will be covered with white hair...when you look at the mirror you'll see wrinkles on your face and you'll feel that you are not pretty anymore...either you'll be surrounded by your family or you'll give your work all of your life time...you'll feel happy or sad about your life... at that time your memories will be your bestfriend..you'll not have time to do what you want..regret somethings you haven't done yet....
Do what makes you happy...you live once dont waste your time,it's your life..make your own rules no matter what happenes...

المحلات

حياتنا بقت عامله زي المحلات اوقات تلاقيها مليانه و متقدرش تدب رجلك في المكان...واوقات تانيه متلاقيش حد...واحنا كده بيجي علينا وقت نلاقي اشخاص كتيير دخلت حياتنا ونحتار نبقى على مين فيهم...وشويه و نلاقي نفسنا هنموت من الوحده....

بيبان

حياتك بيبان...في باب تفتحه و بعد ما تخرج بتسيبه موارب...وفي باب لما تخرج بتقفله بالمفتاح و ترميه...و هي كده ف حياتنا حاجات مش بنقدر ننساها فبنسيبها زي الباب الموارب...وفي حاجات بنحاول ننساها فبنقول نعتبرها زي الباب نقفل عليها و نضيع المفتاح عشان منعرفش نفتحه تاني..
‫

حياتنا العاطفيه

حياتنا العاطفيه بقت بتتلخص في ان...اللي مش مرتبط نفسه يلاقي اللي يملى الفراغ العاطفي اللي جواه...واللي مرتبط مستني يلاقي حد احسن من اللي هو معاه...والبنت مبقاش فارق معاها او عندها صبر انها ترتبط بحد كلوا بقى عايز الجاهز واكن الرجاله بقت بضاعه كل واحده تلحق فرصتها قبل ما حد تاني ياخدها منها و نادر جدا انك تلاقي واحده بتحب واحد وعندها استعداد تستناه مهما طال الوقت...والولد بقى ما بيصدق يلاقي واحده نضيفه وبقى بيقول جواه اما اسيبها على جمب و اعيش حياتي و هي كدا كدا موجوده...او يفضل يوعد في كذا واحده انه عايزها واكنهم قمصان لحد ما يلاقي اللي يليق عليه...

الخبطه

لما تكون راكب عربيه وماشي بيها و تتخبط منك..هتلاقي الخبطه باينه بس هتكمل طريقك...بس ساعات الخبطه بتبقى جامده و بتخليك مش عارف تمشي بيها...وهي كده في حاجات بتفضل معلمه جوانا ومش بننساها بس بنكمل حياتنا...وساعات في حاجات بتخلينا مش قادرين نكمل وبنفضل فتره بعيد وبعد كده بنرجع زي الاول..

الطقم

عارف لما تكون مطقم بنطلون مع تيشرت ومش بتلبسهم إلا مع بعض...وفي يوم جيت لقيت حاجه منهم ضاعت و ركنت التاني وفضلت تقول مفيش حاجه هتليق عليه تاني...وكل ما تشوفه تزعل عليه... وبعدها بفتره اشتريت حاجه وفي يوم فتحت الدولاب وقررت تغير الي فاضل من الطقم اللي ضاع مع اللي اشتريته واكتشفت انه احلى من الاول...(ربنا بياخد منك حاجات عشان يعوضك بالأحسن منها)

التعود

ا بيدخل في علاقه وفاكر نفسه طول الوقت بيعشق اللي قدامه ومش قادر يعيش من غيره...انك تتعود على حد يعني تتعود على وجوده كل يوم..تكلمه او تشوفه مش فارقه بس المهم متحسش انك لوحدك...انت بس بتكمل النقص اللي جواك بيه او حرمانك من وجود حد جمبك وبياخد بأيدك..بيهتم بيك..بيخاف عليك..يخرجك..تجري عليه تحكيله كل حاجه واكنك بتكلم نفسك..بس عمرك ما في يوم هتحس انه واحشك..بتخاف من فكرة انه يسيبك عشان بس مش عايز تدوق طعم الوحده...بس لو سيبته في يوم هتلاقي نفسك مش زعلان عليه هتبقى زعلان على حالك و المكان اللي بقى فاضي جواك وانك بقيت وحيد...بتبقى مش حابب اللي قدامك انت بس حابب الحاله اللي هو معيشهالك...عمرك ما بتفكر في تفاصيل شخصية اللي قدامك كل اللي بتفكر في حياتك و مزاجك بيبقى عامل ازاي وانت معاه...بتفضل تقنع نفسك انك بتحبه وهتلاقيك من نفسك عمرك ما فكرت تقوله كلمه حلوه هو بس اللي بيطلب منك وسواء انت او هو اللي قولتوها بتبقى مش حاسس بيها....في التعود انت بتدور على حد يملى الفراغ العاطفي اللي جواك..تحس بس بطعم الحب اللي شايف كل اللي حواليك عايشه وحاسس بيه..

لكل منا

لكل منا مبدئ لا يمكن ان يتخلى عنه...ولكل منا نقطة ضعف لا يخبر بها احد كي لا تصبح ورقه رابحه ضده في ايدي البعض....ولكل منا هدف يريد ان يحققه حتى وإن طال الوقت او مر العمر به...ولكل من أمنيه يحلم بها كل ليله ويدعي الله ان يحققها له...ولكل منا موقف حدث في حياته أثر فيه وجعله شخص مختلف...ولكل منا هناك شئ ما في ذاكرته يود نسيانه ولكنه يؤكد له في كل ليله انه من الأشياء الغير قابله للنسيان..

مزيفه

اغلب الحاجات اللي بنعملها عشان تفرحنا و تخرجنا من اللي احنا فيه بتبسطنا فعلا...بس بتبقى سعاده مزيفه مجرد انها تضيعلك وقتك و تخلي اليوم يجري بسرعه من غير ما تحس بأي إحساس مزعج يعكنن عليك مزاجك...فبقينا نشتهي سعاده حقيقيه...تحسسنا أننا لسه جوانا روح...ترجعلنا ضحكتنا بدل التكشيره اللي خلت وشنا كله تجاعيد وكأننا عجائز جري بيهم العمر وعلاماته بقت مرسومه على وشهم...بس عمر كله هم وغم ونكد..

السجن

ا برضه ييبقى جوانا احساس بس بنبقى مش قادرين ولا لاقيين الكلام والوقت المناسب عشان نعبر عنه... زي الشخص اللي محبوس في سجن كل ما يخرجوه يرجع تاني لسجنه ويسألوه في حد عاقل ممكن يعمل كده فيكون رده..السجن اهون بكتيير من اني اخرج واشوف ناس ماتتشافش او اعاشر ناس ماتتعاشرش...مانيش ضامن لو خرجت حياتي هتبقى عامله ازاي بعد السنين دي كلها اللي قضتها في الضلمه و الناس هتشوفني ازاي ولا هتتعامل معايا ازاي...ببساطه احنا بقينا نخاف نقول او نعبر باللي جوانا سواء خايفين من رد اللي قدامنا و شكلنا هيبقى عامل ازاي...او متأكدين ان اللي قدامنا عمره ما هيفهمنا او يحس بينا..

مش ليك

ساعات بنلاقي نفسنا هنموت على حاجه ونفضل نفكر فيها و ندعي ربنا انوا ينولهالنا وممكن نفضل فتره طويله على الحال ده...بس اوقات كتير ممكن تلاقي في إشارات من ربنا بتقولك الحاجه دي مش ليك ومش في صالحك بس احنا اللي بنكابر..وفي الأخر ربنا بيديهالك بس ساعتها منك لنفسك بتقول مش عايزها...عارف زي لما تعجبك حاجه في محل تزغللك عينيك و تفضل تتأمل نفسك وانت لابسها وتفضل رايح جاي تبص عليها وتقول ياما نفسي اشتريها بس لما يبقى معايا ويوم ما يبقى معاك تلاقيها مش حلوه عليك خالص وتلاقي نفسك بتقول اللي يشوفك من بره مايشوفكيش في اللبس..

الزواج 1

  الزواج...مفهموم يختلف من شخص لأخر...هناك من يتزوج لأنه يحب شخص 
ما ولا يريد من الدنيا سوى ان يجمعهم بيت واحد ويشيخوا سويا...وهناك 
منيتزوج ليهرب من بيته و بيئته المحيطه به واسباب اخرى لا يعلم بها احد سواه...وهناك من يتزوج ليصبح أب او أم ويشعر بمسؤليه تجاههم و يصبحوا اولادهم افضل منهم و يحققوا ما فشلوا هم في تحقيقه...وهناك من كان يبحث عن الحب ليتزوج و انتهت به الحكايه ان الحب يأتي بالعشره...وهناكمن ارتضت بأول شخص دق على بابها خوفا من المجتمع وكلمة عانس والمقولات المشهوره من الأم واصدقائها "القطر هيفوتك...وافقي يا بنتي دي الفرصه مش بتيجي إلا مره ومش بتتعوض وبكره تندمي انك رفضتي "....وهناك من تبحث عن خزنه متحركه للتزوجه وليس رجل وحب...وهناك من يخاف من فكرة الزواج..فهو حياة اخرى..مسؤليه اكبر..عمر جديد سوف تقضيه مع شخص اخر يشاركك في كل شئ...وهناك من يتزوج ليكمل نصف دينه كيفما يقولون او انه وجد كل من حوله يتزوجون و كونوا اسره إلا هو ف قد صفي به الأمر وحيد فحان وقت الأستقرار...(مهما اختلف مفهومنا عن الزواج فالكل منا نصيبه...فالنصيب هو الحكم في الأخير)...

لما مشيت

لما ابتديت تمشي كنت بتلاقي اللي ماسكلك إيدك وبيمشي معاك وبيدلك على خطوتك...بس لما عرفت تخطي خطوتك بنفسك لقيت رجليك هي اللي مسبتاك على الأرض...ساعات بيبقى نفسك تلاقي اللي واقفلك في ضهرك زي زمان و يلحقك قبل ما تقع...بس بترجع تاني تفوق وتلاقي نفسك لوحدك ولازم انت اللي تشيل نفسك وتختار طريقك بنفسك...هي الدنيا كده بتتولد وكل الناس حواليك... يجي عليك فتره تلقى نفسك لوحدك...وفي اواخر أيامك تلقى كل اللي اتجمعوا يوم ميلادك اتجمعوا يوم مماتك...وترجع تاني وحيد في قبرك زي ما كنت وحيد في بطن امك..

لما

لما ابتديت تمشي كنت بتلاقي اللي ماسكلك إيدك وبيمشي معاك وبيدلك على خطوتك...بس لما عرفت تخطي خطوتك بنفسك لقيت رجليك هي اللي مسبتاك على الأرض...ساعات بيبقى نفسك تلاقي اللي واقفلك في ضهرك زي زمان و يلحقك قبل ما تقع...بس بترجع تاني تفوق وتلاقي نفسك لوحدك ولازم انت اللي تشيل نفسك وتختار طريقك بنفسك...هي الدنيا كده بتتولد وكل الناس حواليك... يجي عليك فتره تلقى نفسك لوحدك...وفي اواخر أيامك تلقى كل اللي اتجمعوا يوم ميلادك اتجمعوا يوم مماتك...وترجع تاني وحيد في قبرك زي ما كنت وحيد في بطن امك..

بص لنفسك

 انت بتقابله في صفه او اكتر بتعجبك فيه تخليك تتشدله وانت بتكلمه...تحب طريقته في الكلام...بس لو اكتشفت فيه عيب بتكرهه و تبتدي تفكر في العيب ده و تقول ده طلع مش زي مانا كنت فاكره...وتبتدي تعمل من العيب ده عيوب كتيير واكنه ابليس اللي انت بتتكلم عليه مش بني ادم من لحم ودم...متمسكش في عيوب الناس وتنسى نفسك... وتبقى زي الاتنين اللي واقفين قدام المرايا واحد مش باصص على نفسه وكل همه انه يطلع حاجه وحشه في اللي جنبه و يبص للي جنبه و يقوله شعرك وحش وايه اللي انت عامله في نفسك ده..الطقم ده مش حلو عليك...بص لنفسك في المرايا الأول وشوف ايه اللي عايز يتظبط فيك واعرف ان انت كمان فيك عيوب ممكن تنفر اللي قدامك منك...
‫

العاقل في زمن المجانين

عارف لما تبقى دكتور نفساني و تمشي في طرقة المستشفى اللي كلها عنابر مجانين وكل ما هتدخل اوضه هتلاقي ان كل اللي جواها جنانه غير التاني....ولو حاولت تقنعه انه عنده مشكله ولازم يتعالج مش هيقتنع بكلامك...عشان هو شايف نفسه دماغه توزن بلد..و هيقول عليك انت اللي مجنون ودماغك عايزه تتشال و تتحط مكانها دماغ تانيه وده دكتور شغلانته يقول على كل الناس مجانين امال هيكسب منين...اهو ده بقى حالنا كل واحد شايف نفسه هو الصح واللي قدامه غلط و مش بيفهم زيه...وممكن كمان توصل انهم يخسروا بعض لمجرد انهم مش متفقين وكل واحد شايف حاجه غير التاني...
‫

غيبوبه

كل حاجه حوالينا بقت عباره عن شخص في غيبوبه بقالوا كتيير و محتارين يشيلوا الأجهزه و يسيبوه يموت ولا يستنوا يمكن تحصل معجزه و يفوق منها...وحياتنا بقت عامله زي العرييه العطلانه اللي بقالها اكتر من سنه مختطش خطوه بره المربع المركونه فيه....مفيش اي جديد بكره زي انهارده وامبارح زي بكره...واكننا بقينا ملتزمين بنمط معين في حياتنا وهو الثبات والوقوف محلك سر....زي اسامينا عمرها ما بتتغير زي ماتولدت بيها زي ما هتموت بيها...بس في اللي بيحاول يغير اسمه وهو عايش اللي هو عايز كل حاجه تبقى على مزاجه و مظبوطه حتى اسمه...حتى كل حاجه بنعملها عشان تخرجنا من اللي احنا قيه بقت زي الأكل اللي ملوش طعم بس  بتاكله عشان تسد جوعك مش اكتر...بس تفتكر احنا هنعمل ايه..هنفضل واقفين محلك سر زي العربيه و في الأخر هنتباع خرده ولا هنغير أسامينا؟..

التناقض...

ماشيين في مجتمع معاكس في كل حاجه...

همك الأكبر والوحيد وبتفكر فيه دايما هو نصك التحتاني...

 بقيت لو عايز تشد حد لحاجه لازم تكتب عليها 18+ ساعتها هتلاقي هجوم عجيب عليها اصلنا مجتمع بيموت في السفاله بطبعه...

بتندد للحريه و بذات حرية المرأه و في أبسط حاجه لو لقيت بنت بتدخن هتقول عليها منظرها مش لطيف...وتفضل تقول للبنت الحق في كل حاجه زيها زي الراجل بس لما تنوي تتجوز بتقول انا عايز واحده ملهاش في حاجه مطرح ماحطها ارجع الاقيها زي ماهي  و لو عارضتك في اي حاجه هتقولها انا الراجل وكلامي يمشي المفروض...

بتندد بحرية الرأي  مع انك لو دخلت مع حد في نقاش بتبقى متزمت في رأيك و مش عايز تسمع اللي قدامك وشايف نفسك انت اللي بتفهم عنه ومينفعش تكمل كلام معاه عشان بيعصبك و ممكن  توصل انك من جواك بتقول ياما نفسي اضربه بأي حاجه قدامي...

لو لقيت اي حد  بيكلمك بطريقه حلوه  يبقى يأما معجب بيك يأما عايز منك مصلحه انما منظور انه مهتم بيك كصديق مش اكتر بيتمحي من دماغك...

 لو كلمت اي بنت وعجبتك هي اه تعجبك وكل حاجه انما لما يقولك صاحبك انت شكلك وقعت و ناوي تخطبها ولا ايه ترد و تقوله انت عبيط دي مش للجواز دا انا هقضي معاها وقت وخلاص بس ليه مفكرتش ان لو مفيش واحد زيك تقضي معاه هي كمان وقت يمكن كانت تبقى مش كده ، بس برضه  في بنات ممكن تقول للشيطان والرذيله قوموا وانا اقعد مكانكوا...

بقيت بتشوف المحترم ملوش قيمه..واللي ملوش قيمه غالي اوي...

اللعب بعقول وقلوب الناس بقى عادي جدا وأكنهم كوتشينه في ايدك بتراهن بيهم في ترابيزة قمار ولما حد يسألك انت بتعشم اللي قدامك ليه طيب حرام كده ربنا هيحاسبك، ترد وانا مالي هو المدلوق...

ودايما ماشي  بمبدئ الكل بيغلط والكل المفروض يسامحك لو غلطت في حقه وفي اي موقف بينك و بين اي حد بترمي كل اللوم على غيرك وبتنسى فكرة ان كلنا بنغلط زي ماكنت واخدها حجتك  و عمرك ما بتفكر ان الغلط بيجي من الطرفين في اغلب الوقت...

دايما فاكر ان اي حاجه انت بتعملها يبقى اللي قدامك كمان بيعملها او زي ما بيقولوا (عشان انت شمال و عاشرت شمال كتير شايف كل اللي حواليك كده)....

التناقض...

ماشيين في مجتمع معاكس في كل حاجه...

همك الأكبر والوحيد وبتفكر فيه دايما هو نصك التحتاني...

 بقيت لو عايز تشد حد لحاجه لازم تكتب عليها 18+ ساعتها هتلاقي هجوم عجيب عليها اصلنا مجتمع بيموت في السفاله بطبعه...

بتندد للحريه و بذات حرية المرأه و في أبسط حاجه لو لقيت بنت بتدخن هتقول عليها منظرها مش لطيف...وتفضل تقول للبنت الحق في كل حاجه زيها زي الراجل بس لما تنوي تتجوز بتقول انا عايز واحده ملهاش في حاجه مطرح ماحطها ارجع الاقيها زي ماهي  و لو عارضتك في اي حاجه هتقولها انا الراجل وكلامي يمشي المفروض... 

بتندد بحرية الرأي  مع انك لو دخلت مع حد في نقاش بتبقى متزمت في رأيك و مش عايز تسمع اللي قدلمك وشايف نفسك انت اللي بتفهم عنه ومينفعش تكمل كلام معاه عشان بيعصبك و ممكن  توصل انك من جواك بتقول يانا نفسي اضريه بأي حاجه قدامي...

لو لقيت اي حد  بيكلمك بطريقه حلوه  يبقى يأما معجب بيك يأما عايز منك مصلحه انما منظور انه مهتم بيك كصديق مش اكتر بيتمحي من دماغك...

 لو كلمت اي بنت وعجبتك هي اه تعجبك وكل حاجه انما لما يقولك صاحبك انت شكلك وقعت و ناوي تخطبها ولا ايه ترد و تقوله انت عبيط دي مش للجواز دا انا هقضي معاها وقت وخلاص بس ليه مفكرتش ان لو مفيش واحد زيك تقضي معاه هي كمان وقت يمكن كانت تبقى مش كده ، بس في بنات ممكن تقول للشيطان والرذيله قوموا وانا اقعد مكانكوا...

بقيت شايف المحترم ملوش قيمه..واللي ملوش قيمه غالي اوي...

اللعب بعقول وقلوب الناس بقى عادي جدا وأكنهم كوتشينه في ايدك بتراهن بيهم في ترابيزة قمار ولما حد يسألك انت بتعشم اللي قدامك ليه طيب حرام كده ربنا هيحاسبك، ترد وانا مالي هو المدلوق...

ماشي  بمبدئ الكل بيغلط والكل المفروض يسامح لو غلط في حقه وفي اي موقف بينك و بين اي حد بترمي كل اللوم على غيرك وبتنسى فكرة ان كل انسان يخطئ و عمرك ما بتفكر ان الغلط بيجي من الطرفين في اغلب الوقت...

دايما فاكر ان اي حاجه انت بتعملها يبقى اللي قدامك كمان بيعملها او زي ما بيقولوا (عشان انت شمال و عاشرت شمال كتير شايف كل اللي حواليك كده)....